Soya va moyli ekinlar elita urug‘chilik xo‘jaligi tashkil etildi

Jizzax viloyati G‘allaorol tumanidagi “Oltin boshoq” massivida O‘zR Qishloq xo‘jaligi vazirligi huzuridagi Urug‘chilikni rivojlantirish markazi tassarufida “G‘allaorol oltin boshoq EUX” MChJ tashkil etildi.

Mazkur xo‘jalikka 26 ta konturdagi jami 512,1 gektar lalmi yer maydonlari biriktirib berildi.

Bugungi kunda tumanda soya va boshqa moyli ekinlar urug‘chiligini yo‘lga qo‘yish maqsadida umumiy maydonning 400 gektari foydalanishga kiritildi. 350 gektar yerga soyaning mahalliy navlaridan “To‘maris Man-60”, “Gavhar”, “Ustoz”, “Hosildor” hamda xorijiy navlardan “Nena”, “Arleta” va boshqa navlari ekildi.

“Yashil makon” umummilliy loyihasi doirasida ushbu maydonlarga 10 ming tup tut, 5 ming tup mevali va ming tup manzarali ko‘chatlar ekilishi ta’minlandi.

Shu bilan bir qatorda soya bilan birga moyli ekinlardan maxsar, zig‘ir, kungaboqar ekinlarining urug‘chiligi ham yo‘lga qo‘yilishi belgilab olingan.

Kelgusida ushbu ekinlardan 800 tonna yuqori avlod sara urug‘liklarini jamg‘arish rejalashtirilgan. Natijada, boshqa davlatlardan soya urug‘liklarini olib kelishga ehtiyoj qolmaydi.

O‘zR Qishloq xo‘jaligi vazirligi Multimedia markazi tomonidan vazirlik huzuridagi Urug‘chilikni rivojlantirish markazi maʼlumoti asosida tayyorlandi.