Agrosubsidiya.uz: 4 yo‘nalish, 19 turdagi subsidiya, bir qator qulayliklar

“Agrosubsidiya” axborot tizimi (agrosubsidiya.uz) qishloq xo‘jaligi mahsulotlarini ishlab chiqaruvchilarga subsidiyalar berish bo‘yicha materiallarni to‘plash, ko‘rib chiqish va vakolatli organlar va tashkilotlar bilan kelishish uchun mo‘ljallangan. Tizim orqali 19 turdagi subsidiyalarni olish imkoniyati mavjud.

Quyidagi yo‘nalishlar bo‘yicha murojaat etish mumkin:

• paxta xomashyosi yetishtirishda suv tejovchi texnologiyalarni joriy etish bo‘yicha xarajatlarning bir qismini qoplash;
• poliz, dukkakli, moyli, dorivor va boshqa ekinlarni yetishtirshda suv tejovchi texnologiyalarni joriy etishga sarflangan harajatlarning bir qismini qoplash;
• suv taʼminoti og‘ir hududlarda aholi tomorqa yer maydonlarini sug‘orish uchun vertikal sug‘orish quduqlarini burg‘ilash va ishga tushirishga sarflangan xarajatlarning bir qismini qoplash;
• yangi intensiv bog‘ va uzumzorlarda zamonaviy sug‘orish texnologiyalarini joriy etishga sarflangan harajatlarning bir qismini qoplash.

Tizim foydalanuvchilari uchun quyidagi afzalliklar yaratilgan:

• Fermerlarga subsidiya olish uchun masofadan elektron tarzda arizalarni yuborish;
• Vakolatli organlar tomonidan arizalarni ko‘rib chiqish;
• Shaxsiy kabinet orqali yoki tizimda yuborilgan ariza raqami (identifikatsiya raqami) orqali ariza ko‘rib chiqilishi maqomini kuzatish;
• Arizani ko‘rib chiqish natijalarini elektron tarzda rasmiylashtirish.

“Agrosubsidiya” axborot tizimi O‘zbekiston Respublikasi Prezidentining 2022-yil 1-martdagi PQ-144-son “Qishloq xo‘jaligida suvni tejaydigan texnologiyalarni joriy etishni yanada takomillashtirish chora-tadbirlari to‘g‘risida”gi qaroriga muvofiq, suv tejovchi texnologiyalarni joriy qilishdagi kamchilik va muammolarni bartaraf etish, suv tanqisligining salbiy taʼsirini yumshatish, shuningdek, qishloq xo‘jaligi ekinlarini yetishtirishda suv resurslaridan samarali foydalanish maqsadida ishlab chiqilgan.

Tizimda (agrosubsidiya.uz) domen manzili orqali subsidiya va manzilli ro‘yhatga kirish uchun ariza yuborish hamda cabinet.agrosubsidiya.uz manzilida ishchi guruhlar tomonidan arizalarni elektron ko‘rib chiqish jarayonlari avtomatlashtirilgan.

“Agrosubsidiya” axborot tizimini doimiy qo‘llab-quvvatlash maqsadida t.me/agrosubsidiya_support telegram-guruhi, hamda 71 206-70-07 raqamlari orqali “call-markaz” faoliyati yo‘lga qo‘yilgan.