YAROQSIZ YER MAYDONIDA QAD KO‘TARGAN ZAMONAVIY INNOVATSION ISSIQXONA

Andijon viloyatining Paxtaobod tumanida joylashgan “Mega agro” MCHJ hududi avval tosh-shag‘all karyer bo‘lgan yerlardan iborat edi. Sohaga qaratilgan ilm va innovatsiya tufayli bugun ushbu maskan zamonaviy issiqxonaga aylantirildi. Hududning “Hayotbaxsh” qishlog‘ida 16 gektar maydonga gidroponika usulida qurilgan ochiq va yopiq ko‘rinishdagi innovatsion issiqxonaning loyiha qiymati 5 mln dollarni tashkil etadi. Bu yerda 100 nafar yangi ishchi o‘rni yaratilib, natijada qishloqdagi ko‘plab xotin-qizlar ish bilan taʼminlandi.

Maqsad. Ushbu issiqxonani qurishda yaroqsiz yer maydonini yana foydalanishga qaytarish, uni unumli ishlatish, suv resurslari bilan yetarlicha taʼminlanmagan, sug‘orish qiyin bo‘lgan maydonlarda ham samarali sug‘orish tizimini yo‘lga qo‘yish ko‘zlangandi.

Yutuq. Eʼtiborlisi, gidroponika usulidagi issiqxonada tomchilatib sug‘orish orqali olti baravar kamroq suv sarflanadi. Eng asosiysi, Ispaniya tajribasi asosida qurilgan bunday issiqxonada yuqori hosildorlik ochiq maydondagiga nisbatan to’rt-besh baravar ko‘proqni tashkil etadi. Odatda anʼanaviy usuldagi issiqxonalarda 1 gektar yerdan 20 tonnagacha hosil olish mumkin. Gidroponika usulidagi issiqxonalarda esa, ko‘rsatkich 80 tonnagacha yetadi.

Ishchi kuchining tejalishi.  Issiqxonada aysberg karami, pomidor, bodring, ularning ko‘chatlari va turli xildagi ko‘katlar yetishtiriladi. Ular nafaqat respublika bozorlariga yetkazib beriladi,balki 1 mln 500 ming dollarlik hajmda eksport qilish rejalashtirilgan.

Masalan, aysberg karami oddiy ekin maydoniga 60 ming donagacha ekilsa, gidroponika issiqxonasida esa 144 ming dona ekiladi. Bunda hosildorlik issiqxonada 3 baravargacha ortiq bo‘ladi. Bu yerda ekinlarni sug‘orish, ularga o‘g‘it berish to‘liq avtomatlashtirilgan. Faqatgina ko‘chat ekish va hosil yig‘ishda ishchi kuchidan foydalaniladi, xolos.