MEVALI DARAXTLARNING KLON PAYVANDTAGLARI VA PAYVANDLANGAN KO‘CHATLARI YETISHTIRILAYOTGAN IN VITRO LABORATORIYASI

In vitro laboratoriyalarida mevali daraxtlarning turli kasallik va zararkunandalardan holi hamda qurg‘oqchilikka chidamli, turli iqlim sharoitiga mos navlarining klon payvandtaglari va payvandlangan ko‘chatlari yetishtiriladi.

Ana shunday laboratoriyalardan biri 2019-yilda Samarqand viloyati Jomboy tumanida “Sag agro” MCHJ tomonidan ishga tushirilgan. Laboratoriya uchun jami 24 gektar yer ajratilgan bo‘lib, shundan 0,24 gektar yer maydonida laboratoriya, 2 gektar maydonda zamonaviy issiqxona qurib bitkazilgan va 3 gektarda yangi issiqxona qurish rejalashtirilgan. Shuningdek, 18 gektardan ortiq yer maydonida O‘zbekistonda uchramaydigan 65 xil  mevali daraxtlar ko‘chatlari, onalik materiallari olib kelinib parvarish qilinmoqda.

Bugungi kunda laboratoriyada yong‘oq, bodom, shaftoli, gilos, o‘rik, nok va olma kabi mevali daraxtlarning klon payvandtaglari va payvandlangan ko‘chatlari tayyorlanmoqda.

2022-yil bahor mavsumida 1 mln dona, kuz mavsumida esa 1,8 mln dona turli xil mevali daraxtlar payvandtaglari, payvandlangan ko‘chatlari va manzarali ko‘chatlar yetishtirish ko‘zda tutilgan. Bundan tashqari, “In vitro” laboratoriyasi 2024-yilda to‘liq quvvat bilan ishga tushiriladi va yillik quvvatni 15 mln donaga chiqarish maqsad qilingan.

Laboratoriya AQSHning “UC Devis” “Driver consulting, INC” kompaniyasi, Samarqand Veterinariya tibbiyot instituti, Samarqand davlat universiteti, Toshkent davlat agrar universiteti Samarqand filiali hamda O‘zbekiston Respublikasi Fanlar Akademiyasi Genomika va bioinformatika markazi bilan hamkorlik aloqalari yo‘lga qo‘yilgan.

Laboratoriyaning 10 dan ziyod biotexnolog, agronom va agroximik xodimlari Turkiya davlatining Adana viloyatida joylashgan “Beta fidanchilik”, Izmir viloyatidagi “Ikiz fidan” In Vitro laboratoriyalarida hamda Mersin viloyatining “Alata arashtirma merkezi” laboratoriyalarida malaka oshirib qaytdilar.