AMERIKA UNIVERSITETLARIDA AMALIYOTGA KO‘PROQ E’TIBOR QARATILADI

O‘zbekiston Respublikasi Qishloq xo‘jaligi vazirligi xodimlari, Toshkent davlat agrar universiteti va Jizzax viloyatidagi G‘allaorol texnikumi rahbariyatidan iborat delegatsiyaning avgust oyidagi Amerikaga 17 kunlik safari nihoyasiga yetmoqda.

Ushbu tashrifning so‘nggi manzili Missisippi Shtati universiteti bo‘ldi. 1878-yilda tashkil etilgan universitetdagi taʼlim yo‘nalishlari, o‘quv rejalarining o‘ziga xosligi hamda talabalar uchun yaratilgan shart-sharoitlar o‘zbekistonlik vakillarning eʼtiborini tortdi. Shuningdek, ikki tomonlama o‘quv rejalari, pedagoglarni tajribasini oshirish va  baholash hamda adabiyotlar tayyorlash bo‘yicha bir qator kelishuvlarga erishildi va yo‘l xaritasi tuzildi.

Eʼtiborli yana bir jihat, ushbu universitetning o‘simlikshunoslik va veterinariya fakultetlarida talabalarga nazariyadan ko‘ra, ko‘proq amaliyot orqali bilim berish yo‘lga qoyilgani bo‘ldi. Masalan, veterinariya fakultetida tahsil oladigan talaba toki universitetni tamomlaguncha mustaqil ravishda 71 ta jarrohlik amaliyoti o‘tkazadi. Bu esa, kelgusida hayvonlarning salomatligiga masʼul kasb sohiblarini yetarli tajriba bilan sohaga qadam qo‘yishini anglatadi. Boshqa yo‘nalishlarda ham ushbu jihatni ko‘rish mumkin.

Bundan tashqari uchrashuvda universitetning respublikamizdagi Jizzax viloyatida joylashgan “SILVER LEAF LLC” QK agroklasteri bilan davom etayotgan hamkorligiga ham to‘xtalib o‘tildi. G‘allaorol agrotexnikumi bitiruvchilarini bandligini taʼminlash va ularni dunyo talablariga mos mutaxassis bo‘lib yetishishiga ko‘maklashuvchi loyihalarning muhokamasi va kelishuvlar ham yurtdoshlarimiz uchun samarali bo‘lishiga erishildi.

Ushbu safar mobaynida ikki tomonlama kelishuvlar va imzolangan loyihalar,o‘rganilgan tajribalar yaqin yillarda yurtimizdagi agrar soha ta’lim tizimida ham ijobiy samarasini ko‘rsatishi kutilmoqda.