UCH TOMONLAMA HAMKORLIK MEMORANDUMI IMZOLANDI

2022-yil 7-sentyabr kuni O‘zbekiston Respublikasi Qishloq xo‘jaligi vazirligida “Qishloq xo‘jaligida standartlashtirish markazi” davlat unitar korxonasi, Qishloq xo‘jaligini mexanizatsiyalash ilmiy-tadqiqot instituti hamda “Agromax himoya” aksiyadorlik jamiyati tomonidan uch tomonlama memorandum imzolandi. Unda O‘zbekiston  Respublikasi Qishloq xo‘jaligi vazirligi Organik ishlab chiqarish va maqbul qishloq xo‘jaligi amaliyotini rivojlantirish boshqarmasi boshlig‘i Anvar Djumanov,  Qishloq xo‘jaligini mexanizatsiyalash ITI direktori Shuhrat Azizov,  “Qishloq xo‘jaligida standartlashtirish markazi” DUK d-irektori Aʼzam Isaqov va “Agromax himoya” AJ direktori To‘ychiboy Soliyev va soha vakillari ishtirok etishdi.  

Ushbu memorandumni imzolashdan maqsad xususiy sektor tomonidan ishlab chiqarilgan mahsulotlarni standartlashtirishda hamda qishloq xo‘jaligi agrotexnik tadbirlariga joriy qilishda agrar sohadagi texnika va texnologiyalardan samarali foydalanish usullarini takomillashtirishdir.

“Agromax himoya” aksiyadorlik jamiyati organik o‘g‘itlar, o‘simliklarni himoya qilish vositalari ishlab chiqarish bilan shug‘ullanadi. Shuningdek, chorva mollari ozuqa mahsulotlariga qo‘shimchalar ishlab chiqarishni ham yo‘lga qo‘ygan. Qishloq xo‘jaligini mexanizatsiyalash ilmiy-tadqiqot instituti esa, Aksiyadorlik jamiyatining o‘simliklarni oziqlantirish va himoya qilish kabi jarayonlarda qo‘llaniladigan o‘g‘itlari, vositalarini texnika yordamida amaliyotda qo‘llab, sinovdan o‘tkazadi. Sinovlar natijalari asosida amaliyotda qo‘llash uslublarini ishlab chiqadi va bu borada tavsiyalar taqdim etadi.

“Qishloq xo‘jaligida standartlashtirish markazi” DUK ushbu amaliyotdan o‘tgan mahsulotlarning standartlarini ishlab chiqish, uning meʼyorlarini belgilab berish, sertifikatlash ishlariga ko‘maklashadi. O‘g‘it va o‘simliklarni himoya qilish  vositalarini ishlab chiqarish jarayoniga xalqaro standart talablarini joriy etishda amaliy yordam ham aynan DUK tomonidan amalga oshirish kelishib olindi. Asosiysi, ushbu hamkorlik natijasida qishloq xo‘jaligi sohasida o‘g‘itlarni gektariga belgilangan meʼyorda qo‘llashga oid tavsiyanomalar, uslubiy qo‘llanmalar yaratiladi. Bu fermer va dehqon xo‘jaliklari uchun qulaylik va yengillik beradi.