ISSIQXONADA BODRING YETISHTIRISH

Bugun aholini yil bo‘yi poliz mahsulotlari bilan taʼminlash maqsadida bodringni issiqxonalarda yetishtirilmoqda. Sahifamizda bodringni issiqxonada yetishtirish bo‘yicha tavsiyalarni taqdim etamiz.

Tuproqni tayyorlash. Bodring ko‘chatlarini ekishdan oldin issiqxona tuprog‘ini ekishga tayyorlanadi. Eng avval issiqxona tuprog‘i tekislanadi. Ekishga mo‘ljallangan maydon kasallik va zararkunandalardan hamda begona o‘tlardan tozalash maqsadida shaffof polietilen plyonka bilan yopib qizdiriladi. Bunda tuproq usti yopilgan holatda 1-1,5 oygacha turadi. So‘ngra plyonka olib tashlanib, issiqxona tuprog‘i tekislanadi va tomchilatib sug‘orish quvurlari yotqiziladi.

Ko‘chatini ekish. Issiqxonada yetishtirish uchun bodringni ko‘proq ko‘chatidan foydalangan maʼqul. Chunki ko‘chatidan ekilsa, o‘simlik kasallik va zararkunandalardan holi bo‘ladi. Shuningdek, o‘simlik ildizi baquvvat bo‘lib, mahsulot erta pishib yetiladi.

O‘zbekiston Respublikasi hududida ekish uchun tavsiya etilgan qishloq xo‘jaligi ekinlari Davlat reestriga 2020-yilda issiqxonalar uchun mahalliy “Navbahor”, “ToshDAU-70”, “Elegant”, “Samar” kabi birinchi avlod duragaylar va chet el duragaylaridan “Roki”, “Fokus”, “Eliza”, “Sultan”, “Majestik”, “Seydra Alamir”, “Alanis”, “Adrian”, “Barxan, Valeystar”, “Kristina”, “Multistar”, “Melen”, “Nail”, “Orzu”, “Passandra”, “Pikolino”, “Pontiya”, “Seray”, “Superdelta”, “Jazzer”, “Xarman”, “Luna”, “Tristan” kabi bir qancha duragaylar tavsiya etilgan.

Ko‘chatlar jo‘yaklarga ikki qator qilib oldindan tayyorlangan chuqurchalarga (uyalarga) o‘tqaziladi. Uyalar dastlab iliq (22-25 °daraja) suv bilan sug‘oriladi. Ko‘chatlar tik holatda, kubik yoki tuvakchalarining 3/4 qismi uyalarga kiritib o‘tqaziladi. O‘sib ketgan ko‘chatlar qiyalatib o‘tqaziladi, ammo poyasi ko‘milmaydi. Ko‘chat o‘tqazilgandan so‘ng jo‘yaklar orqali suv beriladi.

Ekishdan bir hafta o‘tgach, tuproq yuzasidagi begona o‘tlarni tozalash, uni kislorodga to‘yinishi uchun ekinni ildizlariga zarar yetkazmagan holda chopiq qilinadi.

Sim bag‘azlarga bog‘lash. Issiqxonalarda bodring tik bag‘azda (ipga bog‘lab) yetishtiriladi. Bu o‘simliklarning yorug‘likka bo‘lgan talabini yaxshilaydi. Ko‘chat o‘tqazilgandan 5-6 kun o‘tgach, o‘simliklar qator bo‘ylab 2-2,2 metr balandlikda gorizontal tortilgan sim bag‘azlarga iplar qatordagi o‘simliklarning joylashgan o‘rniga sirg‘alib yuruvchi tuguncha qilib bog‘lanadi. Simga bog‘langan ipning ikkinchi uchi kerakli uzunlikda o‘lchab olinib kesiladi

Sug‘orish. Bodring yetishtirishda suvning oz-oz va tez-tez berilishi o‘simlik uchun muhim ahamiyat kasb etadi. Sug‘orish ertalab yoki kechki paytda amalga oshirilishi kerak.

Hosilni yig‘ishtirish. Bodring hosilini uning pishib yetilishiga qarab, salqin oylarda har 2-3 kunda, issiq oylarda har 1-2 kunda teriladi. Agar bodring pishib yetilgach, o‘z vaqtida terilmasa, uning tovarboplik sifati buziladi hamda hosil nobud bo‘ladi. Hosilni ertalab terish kerak. Chunki kunning ikkinchi yarmida terilgan hosil yaxshi saqlanmaydi, sifati buziladi. Terilgan bodringlar omborxonaga yuboriladi.