MEVALI DARAXTLARNI PAYVAND QILISH: BOG‘NI YANGILASH VA HOSILDORLIKNI OSHIRISH

Mevali daraxtlarni payvand qilish bahorgi eng muhim agrotexnik tadbirlardan biridir. Bu haqiqiy jarrohlik amaliyoti hisoblanib, jarayon mobaynida o‘simlikning bir qismi boshqa bir o‘simlikning tanasiga qo‘shilishi va uyg‘unlikdagi hosilni olishga erishish uchun ko‘chirish ishlari o‘tkaziladi. Mevali daraxtlarni payvand qilishning ko‘plab usullari mavjud. Bizning ushbu videomizda iskana payvandlash texnologiyasi haqida hikoya qilinadi. Bunday payvandlash qanday amalga oshirilganligi va nima uchun bunday qilinishi kerakligi haqida Akademik Mahmud Mirzayev nomidagi bog‘dorchilik, uzumchilik va vinochilik ilmiy-tadqiqot institutining kichik ilmiy xodimi Mirnosir Isroilov ma’lumot berdi.

Iskana payvandlash usulidan asosan mevali daraxtlarni payvand qilishda foydalaniladi. Payvandlashdan oldin siz sog‘lom, yaxshi rivojlangan shoxni tanlashingiz kerak. Uning yoshi kamida bir yil bo‘lishi lozim. Lavhamizda esa, Fuji navli olma daraxti payvand qilinadi.

Payvand uchun mo‘ljallangan ko‘chatdan qalamcha kesib olinib, unda 3 ta kurtak qoldiriladi. Ushbu qalamchani maxsus qaychi bilan kesish lozim. Keyin, payvandtagda u uchun mo‘ljallangan joyga  joylashtiriladi.

Bu yerda payvand qalamchasi va payvandtagning bir-biriga mos kelishi juda muhimdir. Agar hamma amaliyot to‘g‘ri bajarilgan bo‘lsa, o‘simlik yaxshi o‘sadi va rivojlanadi. Payvandlangan joy yelim lenta bilan havo kirmaydigan darajada chambarchas bog‘lanadi. Payvand qilingan qalamcha o‘sib, 40-50 santimetrga yetganda, bog‘langan yelim lentani kesib yuborish kerak. Butun payvandlash amaliyotida zaxiradan ortiqcha novdalar olib tashlanadi. Daraxtlarni iskana payvand qilish keksaygan bog‘ni yangilashning eng oson va ko‘p qirrali usullaridan biridir. Ushbu usul bog‘bonlar tomonidan daraxtlarni tabiatning turli xil injiqliklariga “immunitetini” oshirish uchun ham qo‘llaniladi. Bundan tashqari, payvandlash hosildorlikni oshirishga yordam beradi.