AGRAR SOHA XODIMLARI UMUMXALQ HASHARIDA FAOL ISHTIROK ETDI

Davlatimiz rahbarining tashabbusi bilan amalga oshirilayotgan “Yashil makon” umummilliy loyihasi  doirasida yiliga 200 mln tup  daraxt va buta  ko‘chatlarini ekish belgilangan edi.  Bunday keng ko‘lamli  tashabbusning amalga oshirilish natijasida  shaharlarimizdagi  yashil maydonlar hududi  bir necha barobarga oshadi.

Bu yil muqaddas Ramazon oyining Navro‘z umumxalq bayrami kunlarida kirib kelishi  kam uchraydigan holat hisoblanadi. Buning ham o‘ziga xos ramziy ma’no bor. Zero 21 martda  kun-bilan tun tenglashib, tabiatda butun borliq uyg‘onishi, tevarak atrof yashillikka burkanishi kuzatilsa, Ramazon oyida insonlar  ko‘proq ezgu amallarni  qilish orqali qalblarini poklashga, bir-birlarining holidan xabar olib, yo‘qlashga, og‘irini yengil qilishga   harakat qilishadi.

Shu bois bayram arafasida,  ya’ni  18-mart kuni O‘zbekiston Respublikasi Vazirlar Mahkamasining tegishli farmoyishiga muvofiq yurtimiz bo‘ylab  “Obod  va fayzli mahalla – yurt ko‘rki”  shiori ostida umumxalq hashari  bo‘lib o‘tdi.

Unda  yurtimizdagi barcha davlat va nodavlat tashkilotlari vakillari faol ishtirok etishdi.  Jumladan O‘zbekiston Qishloq xo‘jaligi vazirligi tizimidagi  boshqarma va tashkilotlar ishchi xodimlari  hamda  ilmiy tadqiqot institutlari va oliy o‘quv yurtlarining  ilmiy mutaxassislari, o‘qituvchi va talabalar ham Akademik Mahmud Mirzayev nomidagi   bog‘dorchilik, uzumchilik va vinochilik ilmiy-tadqiqot instituti hududini obodonlashtirish, ko‘kalamzorlashtirish  hamda mevali va manzarali daraxt  ko‘chatlarini ekishda  faol ishtirok etdilar.

O‘tkir Ochildiyev Akademik Mahmud Mirzaev nomidagi Bog‘dorchilik, uzumchilik va vinochilik ilmiy tadqiqot instituti  bo‘lim boshlig‘i: 

Bungungi umummiliy hasharimizga qishloq xo‘jaligi tizimidagi 500 nafardan ortiq professor-o‘qituvchilar va talabalar qatnashmoqda. Tadbirning asosiy maqsadi barchada bahorgi kayfiyat bo‘lganligi uchun daraxt ko‘chatlarini ekish uslublari bo‘yicha amaliy tajriba almashish va bahor bayramini uyushqoqlik bilan o‘tkazishga qaratilgan. Hashar davomida ishtirokchilarga institutimiz faoliyati bilan ham tanishtirishni maqsad qilganmiz.

Shuningdek, Akademik Mahmud Mirzayev nomidagi   bog‘dorchilik, uzumchilik va vinochilik ilmiy-tadqiqot instituti va unga yondosh hududlarni obodonlashtirish va ko‘kalamzorlashtirish ishlarida  vazirlik tizimidagi boshqa  ilmiy tadqiqot institutlar vakillari ham munosib ishtirok etishdi.

Abdullo Mansurov Qishloq xo‘jaligi vazirligi g‘allachilik va dukkakli-don  ekinlar boshqarmasi boshlig‘i:

Bugun Qishloq xo‘jaligi vazirligi ishchi xodimlari birdamlikda umummiliy hasharda faol qatnashmoqda. Jamoamiz bugungi tadbirda manzarali daraxt ko‘chatlari ekishga o‘z hissalarini qo‘shishdi. Bu ekilgan ko‘chatlar kelajakda shahrimizni ekologik muhitini yaxshilashga, atrof-muhitni ko‘kalamzorlashtirishga  xizmat qiladi.

Hashar davomida Toshkent davlat agrar universiteti talabalari  ilmiy tadqiqot institutlarining yetakchi ilmiy xodimlari bilan  yonma yon ko‘chat ekishda ishtirok etish bilan birga ularning amaliyot jarayonida as qotadigan qimmatli tavsiyalarini ham olishdi.  Ayniqsa,  oq qayin, Damashq atirguli, yapon safforasi, olma, gilos kabi ko‘plab  noyob mevali  va manzarali daraxt hamda gul ko‘chatlari  ekildi.

Daraxtlar hududning iqlim sharoitidan kelib chiqib, bog‘lar hosil qilish va ko‘kalamzorlashtirishni nazarda tutgan holda tanlab olindi. Endi ular agrotexnik talablar asosida parvarish qilinadi, mineral va organik o‘g‘itlar bilan oziqlantirilib, zararkunandalardan himoya qilib boriladi.