ZAMONAVIY XALQARO MUTAXASSISLAR TAYYORLASH ASOSIY MAQSADGA AYLANMOQDA

Xalqaro qishloq xo‘jaligi universiteti rektori Munira Aminova va professor o‘qituvchilardan iborat guruh Qishloq xo‘jaligi vazirligi huzuridagi “Tuproq tarkibi va repozitoriysi, sifati tahlil markazi” davlat unitar korxonasiga tashrif buyurishdi.

Dastlab an’anaga muvofiq, davlat unitar korxonasining faoliyati bilan tanishildi. Bu yerdagi zamonaviy laboratoriya va undagi asbob-uskunalar, mutaxassislarning ilmiy salohiyatini oshirish borasida olib borilayotgan ishlar, tinim bilmay ishlayotgan texnologiyalarning o‘ziga xosliklari to‘g‘risidagi maʼlumotlar mehmonlarda katta qiziqish uyg‘otdi. Shuningdek, korxona faoliyatiga oid suratga olingan filmlar qizg‘in muhokamalarga sabab bo‘ldi.

“Bugun sohada talabalar, yosh mutaxassislar juda ko‘p. Lekin ularning barchasi ham tuproqning tahlili, uni amalga oshirish jarayonini to‘liq tushunmaydi. Tushunsa ham, nazariy jihatdan bilishi mumkin, ammo amaliyotda buni o‘zi bajara olmaydi. Mana biz ham qishloq xo‘jaligida zamon bilan hamnafas bo‘lgan talabalarni o‘qityapmiz. Maqsadimiz, ular qishloq xo‘jaligining rivojiga xizmat qilsin. Buning uchun esa, avvalo, ularda nazariya bilan bir qatorda amaliy ko‘nikmalar ham shakllanishi lozim. Talabalarimiz ushbu hamkorligimizdan so‘ng sizning korxonangizga kelib, bevosita amaliyotni o‘z ko‘zlari bilan ko‘rishsin, tuproqni qo‘li bilan ushlab, uni tahlilini o‘zlari amalga oshirsin. Ana shundagina biz qishloq xo‘jaligimizni amaliy jihatdan puxta o‘rgangan va uni xalqaro miqyosida tatbiq eta oladigan mutaxassislar yetishtirib bergan bo‘lamiz”, — dedi Xalqaro qishloq xo‘jaligi universiteti rektori Munira Aminova.

O‘zaro tanishuv va samimiy suhbatdan so‘ng ikki tomon o‘rtasida hamkorlik memorandumi imzolandi. Unga ko‘ra, Xalqaro qishloq xo‘jaligi universiteti va davlat unitar korxonasi hamkorlikdagi tadqiqot ishlarining samaradorligi, ilmiy mutaxassislarni tayyorlash va malakasini oshirish borasida kelishuvga erishildi. Shuningdek, ushbu hamkorlik maqsadiga binoan, tomonlar o‘rtasida ilmiy o‘quv dasturlari, ilmiy tadqiqotlar ishlab chiqarish faoliyatini olib borish hamda salohiyatli kadrlar tayyorlash va malakasini oshirishga yo‘naltirish o‘zaro manfaatli hamkorlikka asos bo‘ladi.

Memorandumga ko‘ra, tomonlar quyidagi yo‘nalishlarda hamkorlik qilishadi:

• mutaxassislar bilan tajriba almashish va qo‘shma ilmiy tadqiqotlarni tashkil etish, ushbu yo‘nalishdagi innovatsion texnologiyalarni keng tatbiq etish;
• mutaxassislar malakasini oshirish, ilmiy-amaliy rejalar tuzish, mutaxassis tayyorlash dasturlarini ishlab chiqish, me‘yoriy hujjatlar va dasturlar bilan almashish;
• ijodiy hamkorlik shartlari asosida ilmiy-tadqiqot va eksperimental loyihalash ishlarini bajarish;
• sohadagi muammolar va ularning yechimlari hamda sohani rivojlantirishning istiqbollari yuzasidan seminar treninglar tashkil qilish va ilmiy asoslangan takliflar olish uchun yuqori malakali mutaxassislarni taklif qilish;

Ikki tomonlama manfaatli bo‘lgan memorandum imzolangani to‘g‘risida»Tuproq tarkibi va repozitoriysi, sifati tahlil markazi» davlat unitar korxonasi direktori Odil Jabborov o‘z fikrlari bilan o‘rtoqlashdi:

“Bugungi kunda barcha sohada jahon talablariga mos keladigan mutaxassislarga tuproq tahlillarini o‘tkazish yo‘nalishi ham muhtoj. Shuni inobatga olib, biz Xalqaro qishloq xo‘jaligi universiteti rahbariyati bilan birgalikda tuproqshunoslik sohasida tajribali mutaxassislar tayyorlash, ilm-fanni ishlab chiqarish bilan integratsiya qilish maqsadida ushbu memorandumni imzoladik. Asosiy reja sifatida, universitet talabalarining malakaviy ishlarini, amaliyotlarini xalqaro akkreditatsiyadan o‘tgan ushbu laboratoriyamizda amalga oshirish ko‘zlanmoqda. Shuningdek, korxonamizning yetuk mutaxassislari universitetga borib, sohaga oid bilim va ko‘nikmalarini talabalar bilan o‘rtoqlashishadi. Ushbu universitetni tamomlagan talabalar kelgusida bizning korxonada o‘z faoliyatlarini davom ettirishlarini va birgalikda ko‘plab yutuqlarga erishishni maqsad qildik”.

Mazkur memorandumning imzolanishi sohaga malakali kadrlarni yetkazib berish, tuproq tahlili bo‘yicha amalga oshirilayotgan ishlar unumdorligini ta’minlash hamda mamlakatimiz qishloq xo‘jaligini yanada rivojlantirishda muhim ahamiyatga ega.