UZUM - BOG‘DORCHILIKNING HAQIQIY MO‘JIZASI

Mamlakatimizda uzum yetishtirish borasida Oltiariq mirishkorlari tomonidan ulkan tajriba to‘plangan. So‘lim Farg‘onaning  ushbu tumani mazasi tilni yoradigan uzumlari bilan yurtimizning barcha hududlarida  mashhurlikka erishgan. Bu yerda deyarli har bir oila uzum yetishtirish bilan shug‘ullanadi. Shuni alohida ta’kidlash kerakki, birinchi uzumchilik  tomorqa va dehqonchilik kooperativlari  ham aynan mana shu tumanda faoliyat yuritgan.

Davlatimiz rahbarining Farg‘ona viloyatiga tashriflari davomida suvsiz, rentabelligi past hududlarda uzumzorlarni barpo etish bo‘yicha tashabbuslaridan kelib chiqqan holda barcha viloyatlarda o‘quv-seminarlari o‘tkazilib, Oltiariq tajribasi asosida uzumzorlarni tashkil etish bo‘yicha zarur-chora tadbirlar belgilanmoqda.

Jumladan Andijon, Sirdaryo, Namangan, Samarqand, Buxoro  viloyatlarining  qator tumanlarida   uzumzorlarni tashkil etishda Oltiariq tajribasini qo‘llashga bag‘ishlangan o‘quv-seminarlari o‘tkazilib,  amalga oshiriladigan chora-tadbirlar rejasi belgilab olinmoqda.

Bu kabi seminarlarda  hududlardagi mavjud uzumzorlarni kengaytirish va  ularning hosildorligini oshirish,  yangi uzumzorlarni barpo etish uchun yerni tayyorlash, tok  ko‘chatlarini ekish muddatlari va usullari, uzum kasalliklari va zararkunandalari, tarqalishi ularning hosildorlikka ta’siri, ularga qarshi kurashish  usullari va muddatlari, yosh va hosilli uzumni  parvarishlash agrotexnikasi  jumladan qator orasiga ishlov berish, sug‘orish va oziqlantirishda qo‘yiladigan talablar  bo‘yicha ham batafsil ma’lumotlar berilmoqda.