AGRAR SOHADAGI HAMKORLIK ISTIQBOLLARI KO‘RIB CHIQILDI

Ozarbayjon Respublikasi Prezidenti Ilhom Alievning taklifiga binoan O‘zbekiston Respublikasi Prezidenti Shavkat Mirziyoev rafiqasi bilan birga davlat tashrifi bilan Boku shahrida bo‘lib turgani haqida xabar bergan edik.  Davlat  tashrifi dasturiga ko‘ra ayni paytda har ikki davlatning  turli sohalari rahbarlari va  ishbilarmon doiralari vakillari amaliy  uchrashuvlar o‘tkazmoqda.

Jumladan Qishloq xoʻjaligi vaziri Aziz Voitov ham ikki dalvat o‘rtasida strategik hamkorlikni aynan qishloq xo‘jaligi sohasida ham yangi bosqichga ko‘tarish maqsadida qator  uchrashuvlar o‘tkazmoqda.    Bugun  Aziz  Voitov “Azersun” kompaniyasi bosh direktori Muhammad Goʻzal bilan uchrashdi.

Uchrashuvda  Qishloq xo‘jaligi vaziri Aziz Voitov O‘zbekistonda oziq-ovqat sanoati va qishloq xo‘jaligini rivojlantirish uchun yaratilgan sarmoyaviy imkoniyatlar haqida so‘z yuritar ekan  agrar sohadagi ikki davlat hamkorligining  istiqbollariga ham to‘xtalib o‘tdi.

Muzokaralar chog‘ida tomonlar birgalikda meva yetishtirish bo‘yicha hamkorlikda amalga oshirish mumkin bo‘lgan loyihalarni  ham muhokama qildilar.

Ma’lumot uchun:

Azersun Holding Ozarbayjon konglomerati boʻlib, oziq-ovqat ishlab chiqarish, chakana savdo va qishloq xoʻjaligi sohalarida, asosan, Ozarbayjonda, shuningdek, boshqa MDH mamlakatlari va Yaqin Sharqda faoliyat yuritadi. Azersun Ozarbayjondagi eng yirik oziq-ovqat mahsulotlarini ishlab chiqaruvchi va eksport qiluvchi (28 ta oziq-ovqat markasi ishlab chiqariladi), shuningdek, qog’oz va qadoqlash savdosi bilan shug’ullanadi.