Kartoshka urug‘chiligini rivojlantirish istiqbollari ko‘rib chiqildi

Qishloq xo‘jaligi vaziri Ibrohim Abdurahmonov Vengriya Qishloq xo‘jaligi va tabiiy fanlar universiteti professori Polgar Jolt boshchiligidagi delegatsiya vakillari bilan uchrashdi.

Uchrashuvda yurtimizda kartoshka urug‘chiligini rivojlantirish, sohaga Vengriya tajribasini joriy etish orqali mamlakatimizning barcha hududlaridagi dehqon va fermerlarni sifatli kartoshka urug‘lari bilan ta’minlash masalalari muhokama qilindi.

Professor Polgar Jolt yurtimizning kartoshka nisbatan ko‘p yetishtiriladigan Samarqand, Navoiy va Surxondaryo viloyatlari femer va dehqon xo‘jaliklari bilan hamohanglikda sifatli kartoshka urug‘chiligini rivojlantirish yuzasidan o‘z takliflarini o‘rtaga tashladi.

Vazir Ibrohim Abdurahmonov aholini sifatli oziq-ovqat mahsulotlari bilan ta’minlashga alohida e’tibor qaratilayotgan bir paytda agrar sohada tomonlar uchun bu kabi manfaatli bo‘lgan hamkorlik nafaqat kartoshkachilikda, balki agrar sohaning boshqa tarmoqlarini rivojlantirishda ham muhim ekanini qayd etdi.

Shuningdek, soha xodimlarining o‘zaro tajribasini almashish yo‘nalishida ham Vengriya bilan hamkorlik qilishga tayyor ekanligini bildirdi.

 Uchrashuv chog‘ida vazirlik huzuridagi Sabzavot, poliz ekinlari va kartoshkachilik ilmiy-tadqiqot institutining tajriba maydonida Vengriyaning “Demon”, “Botond”, “Balatoni Rozsa”, “Balatoni Sarga”, “White Lady” kabi kartoshka navlari sinovdan o‘tkazilib, ayni paytda ularning superelita urug‘lik tuganaklari sun’iy sovutgichli omborxonada saqlanayotgani ham aytib o‘tildi.

Vazir o‘z navbatida kartoshka urug‘chiligini rivojlantirish, hududlar iqlimiga mos kartoshka navlarini turli tekshiruv va sinovlardan o‘tkazuvchi laboratoriyalar faoliyatini yanada takomillashtirish yuzasidan mas’ullarga tegishli ko‘rsatmalar berdi.