Kartoshka yetishtirishda  Janubiy Koreya tajribasi o‘rganildi 

Avval xabar berganimizdek, Toshkent davlat agrar universitetida Qishloq xo‘jaligi vazirligi tashabbusi bilan “O‘zbekistonda  kartoshkachilik sohasining istiqbollari. Koreya Respublikasi tajribasi asosida yil davomida kartoshka yetishtirish texnologiyasi” mavzusida seminar-trening bo‘lib o‘tdi.

Yurtimizdagi kartoshka yetishtiruvchilar, qishloq xo‘jaligiga ixtisoslashgan oliy o‘quv yurtlarining talabalari uchun   video-konferens-aloqa shaklida tashkil etilgan tadbirda Samarqand agroinnovatsiyalar va tadqiqotlar instituti rektori, professor Shavkat Hasanov, vazirlik huzuridagi Sabzavot, poliz ekinlari va kartoshkachilik  ilmiy tadqiqot instituti direktori, professor Rustam Nizomov hamda  Janubiy Koreya Xalqaro o‘simlikshunoslik institutining bir guruh professorlari   “O‘zbekistonda kartoshka urug‘chiligini rivojlantirishda kadrlar salohiyatini oshirish” loyihasi, yurtimizda kartoshka yetishtirishning istiqbollari,  Kartoshkaning  kasallik va zararkunandalari va ularga qarshi kurash kabi mavzulardagi ma’ruzalari bilan  qatnashishdi.

Tadbirda aytib o‘tilganidek, Koreya Respublikasida hududlarning tuproq-iqlim sharoitidan kelib chiqib, yil bo‘yi kartoshka yetishtirish yo‘lga qo‘yilgan. Bugungi kunda jami  23,0 ming gektarda, shundan 2,1 ming gektarida qish mavsumida issiqxonalarda kartoshka yetishtirish yo‘lga qo‘yilgan.

Mutaxassislarning fikriga ko‘ra, issiqxona sharoitida kartoshka yetishtirish uchun sarflanadigan  mablag‘  ochiq dalada  kartoshka yetishtirish xarajatlaridan deyarli farq qilmaydi. Yurtimizning iqlim sharoitini yaxshi o‘rganib chiqqan koreyalik mutaxassislar  issiqxonada kartoshka yetishtirish bo‘yicha o‘z tajribalarini  mamlakatimizda ham ommalashtirishning afzalliklariga ham alohida to‘xtalib o‘tishdi.

   Seminar-treningda ta’kidlanganidek, yurtdoshlarimiz qishloq xo‘jaligi mahsulotlari ichida  aynan kartoshkani ikkinchi non sifatida ko‘rishadi.  Shu bois,  aholining  sifatli kartoshkaga bo‘lgan ehtiyoji  yuqori.  Buni e’tiborga olgan Qishloq xo‘jaligi vazirligi  ayni paytda  kartoshka  urug‘chiligini yurtimizning o‘zida yo‘lga qo‘yish, sohaga xorijlik mutaxassislarning tajribalarini keng joriy etishga alohida ahamiyat qaratmoqda.

Jumladan O‘zbekiston va Janubiy Koreya  Respublikasi hamkorligidagi  umumiy qiymati 4,3 mln dollarlik “O‘zbekistonda kartoshka  urug‘chiligini  rivojlantirishda kadrlar salohiyatini  oshirish”  xalqaro loyihasi  o‘z faoliyatini boshladi.  Loyiha Samarqand agroinnovatsiyalar va tadqiqotlar institutida O‘zbekiston Qishloq  xo‘jaligi vazirligi, Janubiy Koreya  Respublikasining Qishloq xo‘jaligi, oziq-ovqat va qishloq hududlarini  rivojlantirish vazirligi hamda Koreya qishloq hududlarini  rivojlantirish korporatsiyasi hamkorligida tashkil etilgan bo‘lib,  O‘zbekistonda kartoshka urug‘chiligi sohasini rivojlantirish, kadrlar salohiyatini oshirish va ilmiy-tadqiqotlar bazasini kuchaytirishga qaratilgan.

   Seminarda  kartoshka kasallik va zararkunandalariga qarshi kurashish,  urug‘lik kartoshkani yetishtirishning innovatsion texnologiyalari hamda kartoshka yetishtirish uchun  O‘zbekiston iqlimiga mos issiqxonalar va ularda yil davomida kartoshka  yetishtirish  kabi mavzular bo‘yicha ishtirokchilar o‘zlarini qiziqtirgan savollarga batafsil javob olishdi.

   Tadbir so‘ngida  o‘z ma’ruzalari bilan ishtirok etgan professorlarga  Qishloq xo‘jaligi vazirligi nomidan  sertifikat va  esdalik sovg‘alari topshirildi.