O‘zbekiston–FAO: qishloq xo‘jaligini raqamlashtirish bo‘yicha Milliy harakatlar dasturi

Bugun poytaxtimizdagi “Wyndham” mehmonxonasida raqamli qishloq xo‘jaligi bo‘yicha milliy va xalqaro manfaatdor tomonlar ishtirokida tadbir bo‘lib o‘tdi. Mazkur tadbirda O‘zbekistonda qishloq xo‘jaligini raqamlashtirish bo‘yicha Milliy harakatlar dasturi taqdim etildi hamda ushbu dasturning maqsadlari va ustuvor yo‘nalishlari to‘g‘risida ma’lumotlar berildi.

Unda ta’kidlanganidek, ushbu dastur mamlakat qishloq xo‘jaligi tizimini zamonaviy, raqobatbardosh va barqaror sohaga aylantirish bo‘yicha strategik qo‘llanma bo‘lib xizmat qiladi.

Tadbirda raqamli qishloq xo‘jaligidagi taraqqiyot va muammolarni muhokama qilish va erishilgan natijalarni sarhisob qilish, shuningdek, O‘zbekistonda raqamli qishloq xo‘jaligiga transformatsiya va manfaatdor tomonlar o‘rtasida hamkorlikdagi sa’y-harakatlarni rivojlantirish bo‘yicha umumiy qarashlarni ilgari surdi.

Qayd etilishicha, “Qishloq xo‘jaligini raqamli transformatsiya qilish uchun asoslarni tayyorlash” loyihasi doirasida FAO O‘zbekistonda raqamli qishloq xo‘jaligining holatini baholadi va manfaatdor tomonlar bilan birgalikda Milliy raqamli qishloq xo‘jaligi harakat dasturini ishlab chiqdi hamda “Markaziy Osiyoda raqamli qishloqlarni sinash” loyihasi doirasida Farg‘ona vodiysida raqamli qishloqlar tashabbusini sinovdan o‘tkazdi.

Loyiha Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) tomonidan O‘zbekiston Respublikasi Qishloq xo‘jaligi vazirligi ko‘magida agro-oziq-ovqat tarmog‘ini raqamlashtirishga to‘sqinlik qiluvchi muammolarni hal qilish maqsadida amalga oshirildi. Ushbu tashabbus Farg‘ona vodiysidagi fermerlar, agrobiznes vakillari, ilmiy-tadqiqot va qishloq xo‘jaligi bo‘yicha maslahat xizmatlari o‘rtasida milliy va markazlashmagan darajada hamkorlik va bilim almashish imkonini berdi. Loyiha O‘zbekiston Respublikasi Prezidentining “Raqamli O‘zbekiston — 2030” strategiyasini tasdiqlash va uni samarali amalga oshirish chora-tadbirlari to‘g‘risida”gi va “Qishloq xo‘jaligida bilim va innovatsiyalar tizimi hamda zamonaviy xizmatlar ko‘rsatishni yanada rivojlantirish to‘g‘risida”gi farmonlarini amalga oshirishga hissa qo‘shdi.

Tadbirda ta’kidlanganidek, loyihaning amalga oshirilishi qishloq xo‘jaligi-oziq-ovqat tizimlariga ta’sir ko‘rsatadigan innovatsiyalarni yaratish va tarqatishga yordam berdi. Bu qishloq uy xo‘jaliklarining imkoniyatlarini kengaytirish va tadbirkorlikni rag‘batlantirish uchun yangi xizmatlar, vositalar va yondashuvlarni rivojlantirishga yordam berdi. Eng muhimi, loyihada nafaqat tegishli muassasalar bilan birgalikda hech kimni ortda qoldirmagan holda qishloq jamoalari, yoshlar, ayollar va qariyalar ham ishtirok etdilar. Qishloq xo‘jaligi ishchi kuchining salmoqli qismini (44% gacha) tashkil etuvchi, lekin hissasi ko‘pincha ko‘zga tashlanmaydigan va tan olinmagan qishloq ayollarini qamrab olish va jalb etishga alohida e’tibor qaratildi. Ularning bilim olishlari va axborot almashishlariga ko‘maklashish maqsadida ular uchun maxsus jonli laboratoriyalar tashkil etildi.

Shu bilan birga texnik hamkorlik loyihalari olingan saboqlar asosida kelajakdagi loyihalarni ishlab chiqish va amalga oshirish uchun asos yaratadi. Ta’kidlanganidek, FAO innovatsiyalar va raqamlashtirish sohasida ishlashni davom ettiradi va O‘zbekiston qishloq xo‘jaligi vazirligi faoliyatini qo‘llab-quvvatlovchi boshqa loyihalar bilan yanada yaqinroq hamkorlikka intiladi.