O‘zbekiston-Tojikiston: agrar sohadagi hamkorlik mustahkamlanmoqda

Ayni paytda O‘zbekiston Respublikasi Qishloq xo‘jaligi vaziri o‘rinbosari Qahramon Yuldashev boshchiligidagi delegatsiya ishchi tashrif bilan Tojikiston Respublikasida bo‘lib turibdi.

Tashrif doirasida delegatsiya a’zolari Tojikiston Qishloq xo‘jaligi vazirligi rahbariyati  va agrar soha tashkilotlari rahbarlari bilan uchrashdi.

Uchrashuvda so‘nggi yillarda ikki davlat o‘rtasidagi yaqin qo‘shnichilik va hamkorlik munosabatlari agrar sohada ham tobora mustahkamlanib borayotgani qayd etilib, qishloq xo‘jaligi sohasida ikki tomonlama hamkorlikning bugungi holati va istiqbolli yo‘nalishlari ko‘rib chiqildi.

Shuni alohida ta’kidlash kerakki, O‘zbekiston Respublikasi Prezidentining  2021-yil 10-11-iyun kunlari Tojikiston Respublikasiga oliy darajadagi tashrifi doirasida erishilgan kelishuvlarga asosan O‘zbekiston – Tojikiston “Do‘stlik bog‘i”ni    barpo etish belgilangan edi.

Tadbirda O‘zbekiston Qishloq xo‘jaligi vazirligi huzuridagi “Agroservis operator” DUK tomonidan  mazkur bog‘ni  barpo etish uchun yer maydoni ajratish,  u yerda  olib boriladigan bunyodkorlik ishlari yuzasidan fikr almashildi.

Shuningdek,  tomonlar  so‘nggi yillarda qishloq xo‘jaligiga  ilm va innovatsiyani  integratsiya qilmasdan  ko‘zlangan maqsadlarga erishib bo‘lmasligini e’tirof etib,   Qishloq xo‘jaligida bilim va innovatsiyalar Milliy markazi – AKISning  filiali faoliyatini Tojikistonda ham yo‘lga qo‘yishni, shuningdek, tojikistonlik fermer va dehqonlarga seminar-treninglar o‘tkazish imkoniyatlarini ko‘rib chiqishdi.

Uchrashuv so‘ngida O‘zbekiston Respublikasi Qishloq xo‘jaligi vazirligi delegatsiyasi tomonidan Tojikiston Qishloq xo‘jaligi vazirligiga kompyuter, noutbuk, konferensiyalar o‘tkazish uchun kamera hamda  interaktiv monitorlar jamlanmasi  taqdim etildi.