Tadbirkorlik uchun fermer xo‘jaligidan yer olmoqchiman

Tadbirkorlik faoliyati bilan shug‘ullanish maqsadida yer maydoni ajratilishida amaliy yordam so‘rab qilgan murojaatingiz yuzasidan quyidagilar ma’lum qilinadi.

O‘zbekiston Respublikasi Vazirlar Mahkamasining 2021-yil 24-noyabrdagi “Qishloq xo‘jaligiga mo‘ljallangan yer uchastkalarini ijaraga berish tartibiga doir normativ-huquqiy hujjatlarni tasdiqlash to‘g‘risida”gi 709-son qarori tasdiqlangan yuridik shaxslarga qishloq xo‘jaligi maqsadlari uchun yer uchastkalarini ijaraga berishning ma’muriy reglamenti talablari bo‘yicha ochiq elektron tanlovlar asosida yer maydonlari ajratiladi.

Shuningdek, O‘zbekiston Respublikasi Prezidentining 2021-yil
23-noyabrdagi “Meva-sabzavotchilik va uzumchilikda oilaviy tadbirkorlikni rivojlantirish, qishloq xo‘jaligi ishlab chiqarishida dehqon xo‘jaliklarining ulushini oshirish chora-tadbirlari to‘g‘risida”gi PQ-20-son qarori bilan zaxiraga qaytarilgan yer maydonlarini dehqon xo‘jaligi tashkil etgan holda sabzavotchilik, poliz, dukkakli, moyli ekinlar, kartoshka yetishtirish kabi loyihalarni amalga oshirish uchun fuqarolarga 0,10 gektardan 1 gektargacha bo‘lgan o‘lchamlarda ochiq elektron tanlov orqali 10 yilga ijaraga berish tartibi tasdiqlangan.

Ushbu qarorga asosan Qoraqalpog‘iston Respublikasi va viloyatlarda bo‘sh turgan va zaxiraga olingan yerlardan hamda fermer xo‘jaliklari va klasterlar foydalanishidagi past hosilli paxta va g‘alla ekinlaridan qisqartirilgan yerlar hisobidan fuqarolarga 0,10 gektardan 1 gektargacha bo‘lgan o‘lchamda ochiq elektron tanlov orqali ijara huquqi asosida ajratilishi belgilangan.
Ma’lumot uchun: Andijon viloyati, Andijon tumanida 2022-yil uchun fermer xo‘jaliklari va klasterlar foydalanishidagi past hosilli paxta va g‘alla ekinlaridan qisqartirilgan yerlar hisobidan fuqarolarga 0,10 gektardan 1 gektargacha bo‘lgan o‘lchamda ochiq elektron tanlov orqali ijara huquqi asosida beriladigan yer maydonlarining hajmlari 136 gektarni tashkil etadi.
Yuqoridagilarga asosan yer ajratish masalasi yuzasidan ochiq elektron tanlovlarda ishtirok etish orqali hal etishingiz maqsadga muvofiq.